Frades queda libre de persoas infectadas por coronavirus, tras o alta dos dous casos positivos das últimas semanas

O Concello de Frades informa de que, segundo o coordinador da Comisión Comarcal de Seguimento do COVID-19, a día de hoxe xa non hai ningún caso de persoas infectadas por coronavirus COVID-19 no municipio. Os dous casos detectados nas últimas semanas xa recibiron a alta definitiva ao daren negativo nos últimos test realizados. Dende o Concello de Frades alegrámonos moito por ambas persoas, así como polas súas familias e amizades.

Unha boa nova quedebe animar a todos os veciños e veciñas de Frades pero que non pode levar a relaxar as medidas preventivas. Compre seguir como ata o de agora: quedar na casa, seguir as recomendacións das autoridades sanitarias e coidar da familia. O Concello continuará realizando labores de limpeza e desinfección dos contedores de lixo e dos lugares máis transitados: supermercados, tendas, farmacias, centro de saúde, estanco...

Ademais, a finais de semana o Concello entregará en cada fogar de Frades máscaras reutilizables para adultos e cativos, así como folletos informativos e uns pasatempos para todas as idades que se poderán seguir dende as redes sociais.