Entregados os diplomas aos 25 participantes no Curso de Poda en Verde organizado polos Concellos de Frades e Mesía

Un total de 25 veciños e veciñas de Frades e Mesía participaron nun Curso de Poda en Verde, clausurado esta fin de semana no multiúsos de Frades. Unha formación organizada conxuntamente polos concellos de Frades e Mesía e na que o alumnado aprendeu a eliminar brotes, tallos e follas innecesarias na vide ou árbores froiteiras no seu período de crecemento, entre outras cousas.

Un curso de 12 horas de duración, que se impartiu durante as mañás do sábado do mes de xuño e que foi clausurado polo concelleiro de Cultura de Frades, Juan Carlos Portos, e a tenente de alcalde de Mesía, Pilar Sánchez Ulloa. Este é o terceiro curso formativo que os concellos de Frades e Mesía organizan de xeito conxunto este ano 2026, despois do Curso de Aplicador-Manipulador de Produtos Fitosanitarios de abril e do Curso de Poda e Enxertos de marzo, que formaron a un total de 72 veciños e veciñas.