Visita aos obradoiros de emprego "Brañas do Illó-Río Samo VII" e "Mancomunidade Ordes IV"

A delegada da Xunta, Belén do Campo, visitou os obradoiros de emprego “Brañas de Illó-Río Samo VII” organizado polos Concellos de Frades, Mesía e Ordes; e “Mancomunidade Ordes IV” no que participan os concellos de Cerceda, Frades, Mesía, Ordes, Oroso, Tordoia e Trazo. Unha visita na que estivo acompañada polos acaldes de Frades, Roberto Rey; Cerceda, Juan Manuel Rodríguez; Mesía, Mariano Iglesias; Oroso, Álex Doval; Tordoia, Antonio Pereiro; e Trazo, Josefina Suárez; así como pola presidenta da Mancomunidade de Ordes, Susana García, e polo director territorial da Consellería de Emprego, Comercio e Emigración, Juan José Couce.

A delegada destacou que estes talleres de emprego teñen unha duración de 9 meses, grazas a un investimento da Xunta de máis de 820.000 euros en ambos talleres, nos que as 40 alumnas e alumnos realizarán intervencións de interese público nestes concellos. O obradoiro “Brañas de Illó-Río Samo VII” está centrado en actividades auxiliares en conservación e mellora de montes e en actividades auxiliares en viveiros, xardíns e centros de xardinería; mentres que o “Mancomunidade Ordes IV” céntrase en pintura industrial en construción e instalación de elementos de carpintaría.

No caso concreto de Frades, o obradoiro de emprego  “Brañas de Illó-Río Samo VII” contempla actuacións de mellora nas áreas recreativas da Ponte Carballa (Abellá), Os Pasos (Aiazo) e A Presa (Ledoira), na praza de Ponte Carreira (Gafoi), no campo de fútbol de Vitre, na piscina municipal (Papucín), no punto limpo (Céltigos), no parque do Cabezo (Abellá) e na finca do local social de Ledoira.

A representante do Goberno autonómico puxo en valor as actuacións que realizarán os alumnos na parte práctica destes cursos. Concretamente, os que se formarán en mellora de montes e xardinaría realizarán 32 intervencións de mellora en parques, áreas recreativas, áreas deportivas, viveiros municipais, paseos fluviais, prazas, piscinas públicas, fincas municipais e campos de fútbol nos municipios de Ordes, Frades e Mesía; mentres que e as alumnas e alumnos do taller de pintura industrial en construción e carpintaría realizarán rehabilitacións na estación de tren de A Pontraga-Parada (Ordes), no local social de Aiazo (Frades), no local social de Oa (Trazo) e na estación de ferrocarril de Trasmonte (Oroso).

Belén do Campo destacou que “os obradoiros de emprego permiten dotar a nosa poboación activa de formación de calidade ao tempo que desenvolven un traballo produtivo de utilidade pública ou interese social, coa posibilidade de acreditalo a través dos certificados de profesionalidade”. “O obxectivo –incidiu– é seguir mellorando o emprego nos concellos galegos, especialmente nos do rural, adaptando a oferta formativa ás demandas e necesidades de contratación da zona”. Neste senso, animou a todos os participantes a aproveitar a formación que van a recibir para buscar traballo e incluso para iniciar o seu propio negocio “porque cando rematedes estes 9 meses estaredes preparados para traballar nuns sectores que precisan, nestes momentos, de profesionais cualificados”, subliñou.

Nos obradoiros de emprego a  Xunta de Galicia encárgase de financiar a formación profesional para o emprego (medios, materiais, contratación de persoal...), así como os custos salariais derivados dos contratos de traballo subscritos co alumnado.

Obradoiros 24-25

A representante do Goberno autonómico informou que a comarca Ordes conta, nesta convocatoria 24-25, con 3 obradoiros duais grazas a un apoio da Xunta de máis de 1,2 millóns de euros para formar a 60 alumnas e alumnos. E é que aos dous visitados esta mañá habería que engadir un terceiro taller organizado por Trazo, Cerceda, Oroso e Tordoia.

Na provincia da Coruña están aprobados 23 obradoiros de emprego duais, grazas a un investimento de máis de 9 millóns de euros para formar 440 persoas sen traballo.

Finalmente, Belén do Campo subliñou que en toda Galicia os obradoiros de emprego duais supoñen un investimento por un importe de máis de 36 millóns de euros para un total de 87 accións deste tipo coas que se prevé beneficiar a máis de 1.700 desempregados.