Telefónica inicia o apagado da súa rede de cobre no municipio de Frades

O Concello de Frades informa de que Telefónica vai iniciar o apagado das centrais de cobre que prestan servizo no ámbito territorial de Frades con motivo da transformación da súa rede de acceso de pares de cobre e o cese no seu uso. Segundo traslada a Axencia para a Modernización Tecnolóxica de Galicia (AMTEGA), este proceso afectará a todos os operadores de telefonía que presten servizo a través de liñas de cobre e se produce ao migrar os usuarios a outras tecnoloxías.

O peche completo da rede de cobre de Telefónica terá lugar o próximo mes de maio de 2025. O Concello de Frades entende que este proceso pode xerar incidencias entre os veciños e veciñas, polo que recomenda que ante calquera problema se poñan en contacto coa súa compañía telefónica a través das súas canles comerciais habituais.