Os Concellos de Frades e Oroso aglomerarán a estrada a Castiñeiro Redondo, que discorre por ambos municipios

As obras, licitadas en case 55.000 euros, estarán rematadas a mediados de outubro.

O Concello de Frades vén de licitar por 54.626 euros as obras de mellora do viario a Castiñeiro Redondo, unha actuación proxectada conxuntamente co Concello de Oroso e que conta cunha achega de máis de 47.000 euros da Consellería de Presidencia, Xustiza e Deportes da Xunta de Galicia. Os Concellos de Frades e Oroso asumen o resto do importe. Unha actuación que ten como obxectivo aglomerar un total de 1.350 metros da estrada que atravesa a localidade de Castiñeiro Redondo, que comparten ambos os dous municipios pois unha parte pertence á parroquia fradense de Moar e a outra á parroquia orosá de Calvente. Así, as obras inclúen actuacións en dous tramos de ambos os dous concellos: de 915 metros de lonxitude en Frades e de 435 metros en Oroso, mantendo en todo caso o ancho de 4,5 metros. As obras inclúen o bacheo previo desta estrada, cuxo firme se atopa bastante desgastado debido ao abundante tráfico que soporte a diario, tanto rodado como peonil. Despois procederase á limpeza de gabias e salvagabias, así como ao aglomerado da pista, con pintado de liñas de bordo e a correspondente sinalización horizontal. No caso de Frades, inclúese a colocación dun sinal de stop na entrada de acceso á pista. Os traballo inclúen tamén a mellora de 300 metros cadrados de abanicos para maior seguridade viaria. As obras foron licitadas polo Concello de Frades á empresa Canarga SL e agárdase que poidan dar comezo antes de que remate este mes de agosto, de forma que estean finalizadas a mediados de outubro. Accesos á localidade Con esta actuación darase continuidade aos traballos de mellora dos accesos a Castiñeiro Redondo executados no segundo semestre de 2025 polo Concello de Frades. Unha obra que incluíu o aglomerado doutro acceso a Castiñeiro Redondo de 410 metros de ancho e 3,5 metros de ancho e que desemboca xusto na pista que agora se vai arranxar. Nesa actuación, o Concello de Frades investira case 13.000 euros para reparar o firme da estrada e melloralo cun aglomerado, completado co pintado de liñas de borde, sinalización horizontal e colocación dun sinal de Stop xusto no punto que separa as parroquias de Moar e Calvente