O Concello de Frades leva rozadas máis de 400 quilómetros de estradas este ano

A Brigada de Incendios encargarase de rozar 12 hectáreas de terreos de propiedade municipal

XX de agosto de 2026 - O Concello de Frades vén de rematar a primeira fase dos traballos de roza dos máis de 600 quilómetros de pistas e estradas que compoñen a súa rede viaria municipal. Os traballos, que se acometeron cos dous tractores, permitiron rozar máis de 400 quilómetros de estradas no municipio.

“Levamos rozadas máis de catrocentos quilómetros de pistas municipais. A 1 de xullo podemos dicir que temos rozadas unha vez todas as pistas asfaltadas de todas as parroquias, así como os eixos principais de comunicación en aglomerado de Frades”, explica Manuel Ferreiro Marzoa, concelleiro de Medio Rural e Limpeza Viaria, quen indica que “seguiremos rozando nas parroquias, arredor das prazas e das igrexas, así como antes das festas parroquiais”.

A maiores, “dende mediados de xuño temos un tractor traballando nas pistas de monte, como medida preventiva contra os lumes forestais e para mellorar os accesos aos nosos gandeiros”, apunta Manuel Ferreiro. Estes traballos preventivos uniranse aos que vai acometer a Brigada de Incendios do Concello de Frades, composta por cinco persoas. Mentres non estean traballando na extinción de lumes forestais, esta brigada encargarase de rozar outras 12 hectáreas de terreos de propiedade municipal como medida preventiva contra os incendios.